Heb 2 | GbrGAW | STEP | Ntu gaiciya ɓo n yi ku wo nyi yi zhin peceiye, Ntuge wada lo n ya jeze navun yi.

Hebrews 2

Yesu Fi Ntu Aza Vinya Ɓo

1 Ntu gaiciya ɓo n yi ku wo nyi yi zhin peceiye, Ntuge wada lo n ya jeze navun yi. 2 Anya amalaika ɓei da nyi, gaiciya nu. Owa gnanazun n tna ɓo vi ko ɓei la ɓe n tatai. Yesu kwa duduyi nu. (Wo du amalaika lo. Owo ɓeda du ɓa nya lo njesun). 3 Ntu cenu, yi ɓa po n wuna n ya na gni-gni dnagmayi ye a ɓoʼa? Gama Yesu ɓei da nabari manayi. Owo abara, n ɓa ɓo wo wo nyi, ɓa ka yi ɓe cei.

4 Aɓo wo-woi nwo abara ɓei zhin nyi: acauta zafun nya, gaiciya ga, aza ka gna ɓedo n waʼazi, ɓa ga seida ge Shekwoyi ɓo kunsun n ɓai.

5 Ya je kpe ge nabari manayi Yesu nya ko du amalaika nya lo ntu ge, Shekwoyi to ɓei ga ɓa nu begyi a nyi nya m, wo ɓo ga Yesu nu. 6 Ɓehinhin, Zabura gna ge, “gbaizanyikwoci, wo zhin kni nu ha zhin tunani ntu wo ɓo a? Owo ɓi zhin kni nu nho ɓa bmawo zhin a?” 7 Ho ɓo la woze n gna amalaika gba n sai fyewyi. Avun ha knu wo lowonyi latu nya n mwa-mwa nya yi, njesun ha tu wo n anya she vinya n ha zhin nyi. 8 Behin-hin, ho la iko ga wo, har owo nu shi anya bwa vinya. Shekwoyi to kni nya ho yan. Ama yi ta gye ce kpam sai Yesu la ɓe. 9 Ama yi gye Yesu lo n wo ɓo la ze ngna amalaika gba. Nsaiye dei Shekwoyi la wo latu, woi la wo ga mwa-mwa ntu ge wa fi ntu yi ɓo. E, ntu Shekwoyi yeye ɓo Yesu wa fi ntu zaho-zahoi ɓo n nanyi. 10 Deye kwa lo dei-dei n Shekwoyi nufiyi nwa zhin anya ntu wohin latu ɓo nyi. Wa zhin bezheyakwo ntu wo wahala ɓo. Ntu lo nu wa mi wa ɓe n nazai n mwabegye n gni-gni zokwo.

11 Yesu n wa zhan yi ya nyi, ɓedo n yi nna lai zhan ya nyi, Eyi dada (wato Shekwoyi) gmanyi nu, cenu zhin Yesu to woi wo vinyikwo n, wa yi-yi ge owo azaje m. 12 Zabura gna ge, “Nɓa ga emazaje oho ye. Nɓa kwo anyi ma la ho tu dna n na aduwa nyakun.” 13 N abado wa je da ge, “Nɓa wo ze omi akpe ma ba. Omi, n mi aɓi yi n Shekwoyi wa ga mi nyi, yi zhi nyi.”

14 She yi zhin nayi n nami yi nyi, wohin wa ze lo nu. Ntu ge wa wu Shetan n wo ikoyi, efi nya yi. 15 Wo ɓo ye ntu ge wa gni aza nɓa wo efi dna tunyi nɓa ma wyi. (Nna bai ɓa po har abada). 16 Wo ta bma amalaika nu zhin, ama wo bma Ibrahim ayawyi nu zhin. 17 Ntu lo nu wa ze ngye owo azaje, n anya vinya. Deye kwa ga wo iko wa zhin pirist dnagmayi. Wo kpe lo shi wo ɓa gye yi sun-sun wa zhin gaiciya n Shekwoyi abye. Ce na zhin wami wala aza laifi. Woi la yi ye ɓedo n Shekwoyi yi. 18 Wa sin wahala jaraba nya. Ntu lo nu, wo ɓa mi wa bma aza zhin n na zhin ɓa jaraba nyi.